中國創新支付（08083）尋日宣布，委任國務院發展研究中心金融研究所所長、人民銀行貨幣政策委員會委員夏斌做佢哋嘅首席經濟顧問，即日起生效，呢類上市公司嘅委任，對夏斌嚟講都算係新鮮事。
永遠都係西裝革履示人嘅夏斌，係內地首屈一指嘅財金專家，雖然佢說話嚴謹，但講到經濟民生等事亦會談笑風生。最記得佢與諾貝爾經濟學獎得主克魯格曼對話，講到金融海嘯嘅教訓時，就風趣咁講：「華爾街飲醉咗，但啲酒係中國送嘅，依家華爾街唔飲嘞，我哋可以自己飲。」
夏斌係一個好勤力嘅學者型專家，直至今日仍然會喺報章發表文章，佢喺過去20年仲出版咗好多財金書籍，包括有《中國貨幣供給理論的實證研究》、《貨幣供應量已不宜作為貨幣政策的唯一中介目標》等得獎作品。根據中國創新嘅公布，由八七年至今，夏斌嘅著作已多達16本。
夏斌係深圳證券交易所首任總經理，仲做過人行金研所副所長、中國證監會交易部主任。佢亦都係多個省市政府嘅特聘專家及顧問，不過接受香港上市公司嘅邀請做首席經濟顧問都係第一次咋，有啲驚喜喎。
余絲韻