王氏港建（00532）主席王忠桐一向搞開工業，佢位公子王賢誌（Vinci）喺演藝界都好出名，依家喺旗下三皇集團健康產品嘅市場推廣部工作，話咁快就做咗兩年，王忠桐話對阿仔嘅表現好滿意，但一講到將盤生意交畀阿仔，佢竟然話阿仔「能力有問題」。
Vinci依家主力做推廣工作，王忠桐都讚佢做得好認真，話好啱佢性格。既然咁滿意，絲絲就話不如將王氏其他範疇嘅業務都交畀阿仔打理，佢即刻話自己好開明，但交畀阿仔做要取決於兩樣嘢，其一係要睇佢係咪願意，其二係有冇咁嘅能力，不過佢認為Vinci依家「能力有問題」，所以未得住，皆因呢個行業係好專業，而且決策又好重要，決策一錯就會好麻煩。
咁不如過番兩招畀Vinci，點知佢話冇得過，一定要靠自己累積經驗。睇嚟王忠桐真係一位嚴父，佢最大嘅期望係阿仔乖乖哋，唔使父母為佢擔心任何嘢喎。
家陣大陸缺電，王忠桐都話好頭痕，東莞嘅廠房受到好大影響，不過佢哋諗到條橋，既可以保證電力供應，仲可以降低電價成本添，就係日夜倒轉，即係員工日頭瞓覺夜晚返工。夜晚嘅電價較日頭平一半，又唔驚隨時斷電，不知幾好，好奇怪係竟然冇員工投訴喎。
佢又話依家已經冇再諗住將公司私有化，事關之前提咗兩次都失敗，用咗超過4,000萬元，當然全部係佢自己畀啦，所以冇把握嘅嘢都唔打算再做囉。
余絲韻