市場熱線：利郎升得有道理

期指收市低水101點，總成交681億元。隔晚美股原本升得好哋哋，但伯老衰多口，個市由升轉跌，其實佢講嘅嘢你知我知冇乜特別，亦反映人心虛怯。港股連日跟住美國佬跌，原本諗住「加時」跟貼A股，點知港股跟咗第二個老細，同A股反而各行各路，深滬股市尋日都微升。

民企深陷信心危機

講到人心虛怯，港股就特別虛，民企帳目問題搞到股民斬腳趾避沙蟲，綠森（00094）復牌狂跌63%，插得仲勁過阿媽，阿媽就話畀「渾水」唱衰沽空圖利啫，綠森就擺明要錢唔要貨，尋日跌幅榜成籮都係民企，之前有幾間民企執笠都未見有咁大信心危機。

藥業股尋日插到飛起，據講話係英國製嘅常用藥都驗到塑化劑出事，結果成為被洗得最勁嘅板塊。不過，食品股卻非常硬淨，完全唔受塑化劑事件影響，包括「台資三寶」。雨潤（01068）逆市升3.4%，古勝喺早個幾禮拜發生懷疑再生肉事件之後，已話咗雨潤低位唔怕買。但食品股有兩隻特別衰，就係超大（00682）同中綠（00904），做下游業務嘅公司起碼可以見到產品通街賣，但做上游種菜嘅就令人驚啲。

二三線股狂瀉，得隻中軟（00354）有聯想弘毅入股而風生水起，弘毅當年收購中國製藥（01093）執到寶，眼光應該唔差。中軟管理層有信心今年可轉虧為盈，如果回落可候低吸納。半新股亦跌得好慘烈，呢排被人插得最勁嘅係熔盛（01101），點解造船股會咁跌法？啱啱入咗MSCI中國指數嘅四環（00460）都穿埋底，超額341倍嘅正業（03363）上市幾日就潛水，真係冇眼睇。

祖國男人錢仲好賺

隻「趴打」（01913）喺弱市以28倍PE招股，有幾多人捧場唔敢樂觀，在下尋日已話「趴打」未來增長都要靠祖國同胞掃貨，要買不如買打正旗號做內地孖屐嘅公司，呢兩日利郎（01234）都逆市上升，尋日更係大成交下升5.5%，隻股有「祖國Armani」稱號，但講知名度當然同「趴打」冇得比；「趴打」係賺女人錢，而利郎主力做男裝，話得說回頭，祖國賺男人錢嘅潛力仲大，因內地男多女少，想搵個結婚對象要男為悅己者容。

利郎尋日上升並唔止係「趴打」因素，公司公布今年冬季訂貨會定單總額按年增長34%，售價同銷量都有雙位數增長，體育用品股訂貨會有兩成以上增長已好勁，可見利郎呢個品牌走勢犀利，而公司主打休閒服嘅新品牌「L2」由於舊年同期基數低嘅關係，定單更加升咗1.35倍。利郎增長快，估值可提升，今年PE可能降到20倍樓下，升得有道理。

戰報

銀基集團（00886）+15%

銀基尋日最高見過7.79元，古晨於五月二十七日推介，當時低位只係6.77元，累計升幅超過15%。

領匯（00823）+11%

市況波動，資金捧領匯，帥哥五月二十四日推介時低位24.75元，以昨高位27.55元計，累升逾11%。

古勝