本港係國際名牌薈萃之地，喺中環更幾乎係五步一名店，十步一潮店。絲絲近日喺中環娛樂行見到一家MCM（Mode Creation Munich）旗艦店開張，先知原來呢個「出生」於德國嘅手袋品牌，喺八十年代曾紅遍一時，喺九十年代雖然曾撤出本港，但○五年被韓國女富商Kim Sung-Joo收購後，由美國紅返轉頭，捧場客仲包括Lady Gaga、王菲及鄭秀文（Sammi）等中外巨星。
MCM近年回流本港，先喺海港城開店作試點，中環旗艦店依家只係Soft launch，本月二十七日就正式開幕，到時會由正進行巡迴演唱嘅亞洲天王級巨星阿Rain剪綵。聽講阿Rain即將入伍服兵役，今次係百忙中來港抽空撐場。
講番MCM老闆金成洙，佢嘅來頭絕對唔簡單，早年以引進各大品牌嘅獨家代理回流韓國而起家，近年收購MCM成為時裝界佳話；MCM品牌喺佢手上重現活力，受亞洲經濟帶動，MCM喺○九年銷售額逾2.5億美元，遠高於○五年嘅1億美元。金成洙更多次被選入亞洲最具權力嘅女商界領袖十強，喺重男輕女嘅韓國社會的確罕見。
余絲韻