絲絲講場：朱李月華唔吼超購王
金利豐金融（01031）（前稱黃金集團）成功借殼上市，老闆娘朱李月華自然人逢喜事精神爽，金利豐尋日喺佢哋位於國金一期嘅辦公室舉行股東會，會後絲絲循例搵朱太及佢丈夫──金利豐主席朱沃裕影張靚相。
乖仔同公司一樣名
期間朱太見到佢嘅乖仔朱俊浩（Kingston）行過Office門口，拿拿聲叫Kingston企埋過嚟一齊影相。講開又講，阿仔Kingston呢個名亦即係金利豐嘅英文名稱。
近期有好多阿太鍾情嘅名牌股上市，米蘭站（01150）更成為「超購王」，但未獲朱太垂青，朱太話米蘭站集資額細，佢並冇認購，亦未幫襯過米蘭站，不過就覺得佢哋嘅經營模式幾成功。可能朱太對消費品股興趣唔大，所以佢話亦冇打算認購將會喺香港上市嘅Prada。
朱沃裕就話，佢哋未來會睇重內地市場，而資產管理方面嘅招聘情況，就好似澳門賭場咁玩「音樂椅」，一有新公司或新賭場開，啲人才就轉嚟轉去，佢哋喺澳門都好難請人，但行內都有咁嘅情況，所以佢並唔係太擔心。至於佢哋喺澳門嘅兩間酒店，經過翻新後，雖然房價貴咗，但入住率亦都高咗。
余絲韻