近年內地經濟蓬勃，亦帶挈埋醫藥行業嘅發展，主力內銷藥品嘅李氏大藥廠（00950），業績由○七年起大躍進，但原本呢間本地藥廠喺創業初期，亦經歷過好多不為人知嘅辛酸史。
李氏大藥廠嘅CEO李小羿博士同絲絲講，話由於研發藥品係屬於長期嘅投資，所以佢哋早年為咗慳錢，位於安徽省合肥市嘅廠房即使喺冬天氣溫低至零度以下，亦唔開暖氣，寧願將慳到嘅3萬幾蚊投入公司，為咗公司嘅發展不惜捱凍開工。
李博士話，雖然佢哋好努力咁經營間廠，但港府就唔多支持，除咗科學園有Support外，其他政府部門就好官僚，故步自封，相關嘅配合措施投入不足；相反，內地就好支持藥物嘅研發，佢哋打算就一種肝癌藥嘅臨床階段申請資助，若然成功，就可以獲得1,000萬至2,000萬元嘅資助，而且內地仲補貼埋專利申請添。
佢仲話，佢哋好着重社會責任，所以研發嘅新藥主要集中用喺專科或較罕有嘅病，希望能夠幫到有需要嘅病人。李博士咁有Heart，政府都好應該作出相關配合，令本地藥廠可以研發更多好嘅藥。
平時除咗營運公司之外，李博士本身亦好專注藥物嘅研究，所以佢喺近年都冇同阿哥（前上市公司兆峰陶瓷舵手李兆峰）有新搞作。
余絲韻