絲絲講場：戴志凱任滙豐中國副CEO
大家都等緊滙控（00005）下周公布今年首季業務概況，滙控旗下嘅滙豐銀行（中國）尋日就公布新人事變動，委任戴志凱為滙豐中國副行政總裁兼執行董事，有關任命已獲監管機構批准。
滙豐對上一次嘅重要人事變動，要數到鄭海泉喺二月底辭去滙控執董職務，當時冇講明佢係咪同時辭去滙豐中國董事長個位，不過好多人都當佢一次過辭晒呢啲有實務嘅位。
北美工商業務前主管
大家可能對戴志凱較陌生，其實佢加入滙豐已超過25年，曾喺滙豐歐洲及北美地區擔任要職，對上一個職銜係滙豐美國北美地區工商業務主管，常駐紐約。佢今次跨過半個地球加入滙豐中國，並唔係毫無因由，事關佢早喺倫敦工作期間已曾參與滙豐嘅中國事務。
滙豐中國行長黃碧娟大讚呢位新拍檔，話可憑藉戴志凱對國際市場嘅豐富經驗，結合滙豐中國嘅專長，協助內企發展海外市場。戴志凱與中國事務甚有緣，佢係紐約華美協進社嘅理事會成員，該會通過文化、藝術、教育、經濟等層面交流，促進美國各界對中國嘅了解。
余絲韻