港股走勢進一步轉差，但自日本地震以來幾乎未好過嘅幾隻電力設備股就逆市反彈，其中哈動（01133）升幅接近一成，收報7.93元。
哈動股價由日本地震發生前報10元左右，跌至尋日最低曾見7.1元，較高位唔見咗接近三成，原因大家都知，就係福島核電廠事故，令中央叫停核電項目審批，哈動等一眾電力設備股，前景因而蒙上陰影。不過，睇番哈動去年業績，以營業額計，火電設備仍是主要收入來源，佔總收入的62%，至於年內新簽定單當中，煤電設備仍佔41.7%、至於核電設備則佔25.8%。而哈動管理層早前亦現身解畫，表示目前手頭累計1,000億元人民幣定單中，核電設備只佔180億元。
既然核電佔哈動不到兩成生意額，但股價就已經唔見咗三成，何況內地核電發展步伐放慢亦只屬暫時，股價明顯跌過龍，昨日單日轉向，以一支大陽燭升穿10日線，動力強勁，相信短線可重上9元水平，止蝕7.4元。
詩詩