華為就4G專利技術告中興通訊（00763）侵權，若然告得入，中興喺最壞情況下可能要賠償數百萬美元。事件已搞到好國際化，因為唔單只中國法院，兩公司仲要訴諸德國、法國及匈牙利嘅法院嚟評理，連中國工信部亦要召華為董事陳黎芳傾偈，希望雙方可以協調，唔好搞到咁大鑊。
事緣係華為喺四月二十八日對外宣布，會喺4個國家起訴中興侵犯華為嘅4G專利技術，唔夠一日，中興就喺內地反告華為侵犯佢哋嘅4G若干專利。
有業內人士話，華為之所以要去歐洲3個國家控告中興，皆因嗰度係佢哋產品銷售嘅主要市場。
華為首席法務官宋柳平估計，向中興索償嘅賠償金可能高達數百萬美元。
兩家中國電訊設備商搞到咁大件事，作為行業監管部門嘅工信部自然要插手，即刻約見華為董事陳黎芳摸底，不過華為就講明話一定要告到底。
（余絲韻）