好多人買股票都希望「財息兼收」，尤其係依家銀行利息咁低，如果隻股票有3厘以上嘅利息回報其實都算唔錯。不過內地最近就發現，原來有414家內地上市公司喺過去5年從來未派過股息，佔A股上市公司總數差唔多四分之一。
據內地媒體所講，呢414家5年冇派息嘅公司大部分集中六大行業，分別係機械設備（佔60家）、房地產（佔48家）、石化（佔43家）、生物製藥（佔31家）、訊息技術（佔34家）及原材料（佔28家）。咪以為公司係因為冇錢賺先至長期唔派息，其實當中136家公司係有錢賺，佔總數32.85%，當中港人較熟悉嘅南航（01055），佢哋嘅A股過去5年嘅實現淨利潤有33.95億元人民幣，唔派息可能係為咗要留多啲錢作未來發展喇。
內地媒體嘅統計又發現，由女性做董事長嘅上市公司，派息機會係低於整體平均值。滬深兩市嘅2,175家上市公司中，去年有逾63%公司有派息，而以女性做董事長嘅上市公司有87家，去年只有56.32%公司有派息，唔派息嘅原因主要係業績唔理想。絲絲希望呢啲公司今年做番好啲，有息派就皆大歡喜嘞！
（余絲韻）