市場熱線：青啤睇位炒上落

內銀股暫時要忍手

人行話存款準備金率冇上限，加埋銀監會公布提高資本充足率，即刻嚇到內銀股有啲腳軟，滬綜指同深成指亦分別跌2.26%同2.84%。點可能冇上限？錢莊唔使借錢畀人咩？冇錢借個社會點運轉？不過，內銀股暫時要忍吓手，第一季業績咁靚都出埋，值博率變得低咗。

電力設備股同水泥股一得一失，水泥股升得多係要嘔，電力股近日炒加電費憧憬，電力設備股亦可話跌得多而技術反彈，但連埋中核（02302）都翻生，令人懷疑祖國高官有為核電打氣言論，但孖屐係講邏輯推理，祖國猛話電荒同限電，即係核電會「被迫」繼續用；另方面，如果核電翻生，太陽能股就冇咁巴閉，所以保利協鑫（03800）同卡姆丹克（00712）即時回落。推理係由一想二、由二想三，可惜古勝好多時都係事後孔明。

中信資源（01205）玩供股，古勝認為供股最大目的係畀班大粒股東低價增持嘅機會，除咗啲一路向下炒嘅細價股之外，中大價股供股後嘅表現一向唔曳，近排亦有中國建築（03311）同中通服（00552）做例子，而政府計劃掟幾百億去起機場第3條跑道，到時又係益咗中國建築。

至於大比例、大折讓供股嘅細價股當然制唔過，睇隻中國置業（00736）就係樣辦，無論之前炒到飛天，但新股一出就點會畀錢你賺？

夏天又到，啤酒股同冷氣股最當時得令，冷氣股係志高（00449），有條幾靚嘅上升軌托住。而啤酒股尋日表現亦唔錯，青島啤酒（00168）升3.24%，金威啤（00124）微升，華創（00291）則冇升跌。金威啤原本獲華創高價入股，但粵海話肥水不流別人田，令華創好夢成空，亦都反映內需股隨時有意想不到嘅溢價。

毛利率仍未受影響

依家祖國樣樣都唔准加價，好多人驚啤酒又係同一命運，原材料價格上升但又轉嫁唔到去消費者身上，結果造成毛利率下跌。但青啤首季仍賺多40%，證明毛利率未受影響，主要係貴價啤酒較好賣，抵銷成本上漲因素。雖然話發改委約見唔同行業希望佢哋高抬貴手，但古勝睇內地傳媒話部分啤酒已加價，就算唔加價都要「瘦身」，即係以前同一價錢賣640毫升一支嘅啤酒，依家只係得550毫升。

青啤祖國啤酒一哥個位雖然已被雪花啤搶咗，但青啤高檔酒所佔比例始終最高。隻股想當年PE曾經達60倍，現時往績PE係32倍，預測PE係25至28倍，可以炒上落。

戰報

三江化工（02198）+12%

古晨上月二十一日推介三江化工，尋日一度抽上3.55元，較推介日低位3.16元，有逾12%進帳。

華潤電力（00836）+8%

古勝周二睇好嘅華潤電力成為逆市奇葩，尋日抽上高位15.54元，較推介日低位14.4元賺近8%。

古勝