絲絲講場：恒生義工探訪基層兒童 齊做蛋糕賀復活節
復活節仲有幾日就到，恒生銀行（00011）義工隊率先走到屯門，與區內一班基層小朋友齊齊裝飾Cupcake慶祝復活節，該行投資產品業務主管李佩珊更化身復活兔，與小朋友打成一片。
小朋友聽見有得慶祝復活節已經好雀躍，可以親手製造復活節Cupcake就更加係開心到加零一，其中有位細路女就好乖咁話，會將自製Cupcake送畀父母做復活節禮物喎。
原來唔單只恒生員工，就連員工家屬都可以一齊參與義工活動。李佩珊話，好開心可以同兩個囝囝齊齊做義工，除咗與小朋友一齊慶祝復活節，仲可以發揮創意裝飾Cupcake，見到其他義工同事都出力扮鬼扮馬，令佢非常難忘。
恒生義工隊平日嘅活動仲包括探訪低收入家庭兒童及獨居老人、幫老人家剪頭髮、郊區植樹等，去年義工隊嘅服務時數已接近2萬小時喇。
余絲韻