絲絲講場：滙豐銅獅贈港交所
講起滙豐，大笨象同埋總行門口一對銅獅子都係佢哋嘅Icon，尋日滙豐喺香港推出佢哋嘅第一隻ETF，就揀咗呢對「門神」銅獅做複製品送畀港交所。
呢對擺喺滙豐總行門口嘅「門神」，左面嗰隻叫Stephen，右面嗰隻叫Stitt。前輩話，銅獅駐守上海不久後，香港就複製一對，複製過程長達兩年，據講每隻銅獅重達2,250公斤，所以要將銅獅「斬件」鑄造再合併，喺一九三五年運港駐守皇后大道中舊滙豐總行，即係話把守滙豐總行已超過75年。
銅獅有幾個複製品，香港呢對屬於第二代複製品，第三及第四代分別放喺倫敦金絲雀碼頭滙豐集團總部及滙豐中國上海總部大樓。今次送畀港交所嘅，都算係變相嘅第五代，但Size就係超細碼！
滙豐ETF產品增至23隻
滙豐公關姐姐話，今次喺香港首推嘅ETF名為「滙豐大中華ETF系列」，包含4隻ETF，當中有全球首隻追蹤MSCI金龍指數以及亞洲首隻追蹤MSCI香港指數嘅ETF，前年已經喺歐洲市場推出，依家滙豐嘅ETF產品已經增至23隻，包括已發展市場及新興市場嘅股票指數，相信投資者有多個選擇抗通脹。
余絲韻