係人都知礦業資源買少見少，大陸企業更頻頻四出搜購，絲絲尋日睇咗一份調查報告，對調查結果感到有啲錯愕，原來大陸唔係買得最狼嘅國家，去年只佔全球礦業交易嘅6%，與加拿大嘅36%、美國及澳洲各佔16%比較，真係輸咗幾條街。
呢項調查係由羅兵咸永道做嘅，數據計到截至去年十二月底嘅10年資料，佢哋嘅中國礦業主管合夥人蘇啟元話，雖然去年大陸買家僅佔全球已完成交易嘅6%，但唔代表佢哋對購併冇興趣，大陸企業正變得更有選擇性或注重交易估值，喺礦業資產價格上漲嘅情況下，可能反映咗完成交易嘅數量減少。
呢10年間，大陸總共完成400宗購併交易，交易總額近480億美元，與10年前比較已經係大躍進。蘇啟元唔單只睇好大陸會繼續投資全球礦業，佢仲估計印度、韓國及日本亦會加入搜購，咁多國家搜購，真係隨時變爭購。
余絲韻