內地上市嘅地產龍頭大佬萬科，喺幾日前公布咗全年業績，佢哋嘅一班管理層尋日嚟咗香港，向本港傳媒及分析員講解佢哋公司嘅業績。冇見一年，萬科嘅銷售金額成功突破千億元，而且增長咗唔少，不過絲絲就發現佢哋嘅總裁郁亮，身形與公司業績走勢啱啱相反，足足細咗成個碼！
萬科主席王石鍾意登山、滑翔呢啲運動，相信唔少人都知，郁總就話佢效法咗王石嘅精神，自己喺去年開始跑步，就喺一年間體重足足減咗14公斤！唔少人都係為咗健康先至去減肥，不過郁總就講笑咁話，佢只係想上鏡好睇啲喎！絲絲真係估唔到，郁總除咗賣樓落力之外，減肥都一樣咁勤力。
其實唔少人都話想減肥，以郁總呢個減咗14公斤嘅例子嚟睇，做運動真係最有效及最健康嘅方法！絲絲都要向郁總求教減肥心得，以求上鏡都可以靚啲！
余絲韻