中國經濟近年發展迅速，銀行業肯定係最受惠嘅行業之一，不過貴為國務院副總理嘅王岐山尋日就突然發火，狠批內地銀行唔應該「一味求大」，仲話銀行嘅錢係向老百姓借番嚟，遲早要還。呢番話如果畀一班內銀老總聽到，唔知會唔會嚇到佢哋標冷汗呢？
王岐山話，依家內銀一味大規模發展，但就冇留意同質化嘅問題，皆因如果全國都係大規模銀行，搞到啲小企業貸款無門，隨時會令到好多農場、養殖場執笠。佢仲話依家好多地方銀行搞跨區發展，仲點名話北京銀行「我瞌一瞌眼瞓，醒番就唔見咗佢哋」；佢話北京銀行近幾年搞得唔錯，但去年突然間走咗去哈爾濱，又話今年要發展埋上海業務，「唔通咁大個北京仲唔夠你哋做？」
近幾年內銀不斷擴大規模，王岐山就話銀行用咁多錢請人起樓，但一定要謹記佢哋嘅錢全部係向老百姓借，用咗係一定要還咁話喎。
余絲韻