唔少富豪都寧願過簡樸嘅生活，但間唔中「大使」，放縱一下都好合情合理，不過慳家慳到好似中國首富宗慶后咁，一年用唔到5萬元（人民幣‧下同）就真係少見。有人話佢因慳致富，亦有人話佢過住軍訓一樣嘅生活，佢自己就話係因為太忙冇時間使錢喎。
去年登上《福布斯》中國富豪榜首位嘅宗慶后，今年66歲，係娃哈哈集團嘅董事長兼總經理，估計身家達70億美元，全球富豪排名第103位。好多員工都知，佢每朝7點鐘返工，夜晚做到11點先肯放工，年終無休，農曆新年照樣開工。佢喺杭州總部嘅總經理室就放咗一張床，準備隨時開通宵要喺公司過夜。
唔嗜賭、唔豪飲、唔打Golf，如果唔使出差或外出見分銷商，食飯只會幫襯公司飯堂，宗慶后每日個人支出用唔到130蚊，一年支出少過5萬蚊。佢接受《彭博社》訪問時話，賺錢令佢覺得人生有價值。認識佢嘅人就話，宗慶后經常會留意每一項支出，就連買一支掃把都要知道幾多錢，令到公司嘅成本控制得好好。
宗慶后喺農村出身，年輕時嘅日子過得好艱苦，又經過文革洗禮，42歲開始創業，但並唔係一帆風順，可能因為苦日子過得多，練就咗刻苦耐勞嘅性格。
娃哈哈依家喺內地飲品業嘅市佔率有7.2%，排名僅次於可口可樂（17.2%）及康師傅控股（13.2%）。宗慶后話，希望透過喺二、三線城市開設連鎖分銷店提升市佔率，長遠係想將娃哈哈打入世界五百強企業。
余絲韻