港股連升第三日，雖然恒指升勢有所減弱，但不少散戶愛股就大放異彩，好似詩詩一直追蹤嘅本地成衣零售股，尋日普遍有不俗升幅，按照近幾個月嘅炒作經驗，相信化妝品股又會係下一波炒上嘅對象，莎莎（00178）尋日已率先升3%，卓悅（00653）只升唔夠1%，自然更值得跟進。
受惠去年本地零售市道暢旺，卓悅截至去年六月底止中期盈利增長22.2%，至8,487萬元，相信全年業績可進一步向好。詩詩舊年十一月推介卓悅時，股價為1.4元左右，目標1.75元，上月升至1.72元後回落，但去番1.5元水平已見跌唔落，尋日收報1.56元。
雖然聖誕新年假期過去，但農曆新年消費檔期就快又到，呢段時間零售股仍然係不愁炒作機會，不過睇番卓悅走勢，舊年幾次炒到上1.7元左右都受阻而回，所以建議在突破此關之前，較宜以炒波幅為主，到正式升穿之後，才加碼追入未遲。
詩詩