新一年開始，好多商家都會發表一下拓展商機嘅睇法，利豐集團旗下嘅利豐研究中心就大派商機貼士，話「銀髮市場」會與地鐵經濟、網上零售、消費升級一樣，大有商機。
俗語都有話「家有一老，如有一寶」，隨着社會人口老化，「銀髮族」消費群不斷擴大，未來嘅消費市場亦靠晒佢哋。查實依家市場上有關「銀髮族」嘅產品愈嚟愈多，好似美國有公司收購老人家嘅人壽保險，香港亦有安老按揭，呢啲都係針對銀髮一族需要嘅產品。利豐研究中心經理林至穎亦覺得，銀髮族市場潛力好大，但現時仍未受重視，只要深入觀察老人家嘅消費需求，提供合適嘅商品及服務，真係商機無限。
利豐研究呢個結論係來自160名學術界、商界及商務部人士嘅意見及投票，搵出「2011年中國商業十大熱點」後，再推論出四大商機領域。十大熱點仲包括綠色低碳零售升溫、商業街建設進入高峰期等，不過通脹高企令消費品零售總額實際增幅放緩，而諸如家電、汽車嘅補貼計劃未來未必再有。
（余絲韻）