人才係現代企業嘅重要資產，唔少老闆願意以高薪厚酬吸引人才加入，好似「電訊魔童」王維基嘅城市電訊（01137），尋日就宣布將集團「CXO of the Future」管理人員培訓計劃嘅起薪點，進一步調升至每月36,000元，較○九年透過相同計劃加入集團嘅22,000元起薪點大升逾60%。
CXO計劃類似某啲大型企業所叫嘅Management Trainee（MT），城電本年度MT計劃嘅招聘，其實早喺去年十月已經喺本港多家大學展開，絲絲睇番城電過往嘅介紹，呢個計劃嘅起薪點原本已調升至24,000元，城電喺一月底計劃截止前，再將起薪點調高至與政府AO相若嘅每月36,000元，相信係想吸引更多人申請，佢哋亦講明經連串甄選後，最多只會聘請兩名員工加入。據城電所講，集團○九年推出相同計劃時曾接獲793份申請，喺包括野外訓練在內嘅連串選拔後，最終雖然只發出1份聘書，但呢位幸運兒最終冇加入集團，至於城電今次「加薪」後係咪可如願請到集團未來嘅CXO，就要睇吓市場爭人才嘅遊戲有幾激烈喇。
（余絲韻）