市場熱線：中鐵勝在夠穩健

本地零售股又翻炒

尋日老古話追落後、捨強勢股，點知孖屣即刻又炒番本地零售股，呢類股好似欲斷難斷。近排天氣凍對賣衫股有着數，但以依家估值，應該改變策略以炒上落為主。而強勢股的確有回吐迹象，好似海爾（01169）同中海油服（02883）見腳軟，買股始終要睇PE，當本地賣衫股貴過思捷（00330）一倍嘅時候，掉轉槍頭亦係正常。

中國燃氣（00384）兩高層證實係因涉嫌職務侵佔罪而被捕，好彩中燃話暫時冇發覺唔見錢，民企風險高係人都知，以前北泰同第一天然食品大把現金都搞到清盤收場。其實，四至九線股玩財技叻過做生意係人都知，不斷供股同批股抽水，然後公司年年蝕錢，啲錢大部分落入大股東個袋，例如高價買個爛礦返嚟，能否賺回開採成本亦成疑問。

據《21世紀經濟報道》講，南車（01766）計劃同北車合併，唔怪得之南車股價由舊年開始好似坐高鐵咁飆升，兩強合併即係佢哋玩晒，直情係反社會潮流。如果係堅料嘅話，目的當然係走向世界，合而為一同國際競爭對手鍊過。

至於單消息有幾堅就唔知，但南車股價由○九年長期喺5蚊樓下，到依家升足1倍有多，若單計鐵路概念好似太誇張，畢竟話起鐵路已有三幾年，所謂空穴來風未必無因，但依家先追貨又有好高風險。

其實鐵路股唔係概念咁簡單，祖國未來係鐵路王國，城市之間、城鎮之間同市內靠鐵路聯繫，甚至研究起高鐵直通越南、柬埔寨同緬甸。北京話限制買車，都係學香港用地鐵做集體運輸工具。

南車固然係好股，但之前冇買嘅股友要高追實在要好大勇氣，不如揀番「基建三寶」，更合乎追落後原則，當中最弱嘅中交建（01800）今年率先跑出，皆因佢計劃走後門上A股，剩低兩隻更有鐵路概念，而中鐵建（01186）自從喺沙特「瀨嘢」之後印象分大跌，所以中鐵（00390）拋離佢亦算正常，尋日突破上月高位，可惜收市未能企穩6蚊樓上。

長遠減少塞車問題

中鐵同中鐵建嘅關係，有啲似南車同北車，雖然「兩鐵」合共佔咗鐵路工程嘅85%，但其他工程有好多競爭對手，就算合併都唔似「兩車」咁可以取得壟斷。

人人都講高鐵，聽講今年車速可以升到400公里樓上，而京滬鐵路今年中通車，肯定會掀起高潮，高鐵穩奪今年嘅最佳主角，另外好多城市正興建地鐵，而大陸咁塞車主要係唔夠公路，鐵路同公路未來路路暢通，中鐵唔可能好似南車咁升成倍，但穩中求勝應該唔錯。

戰報

勝獅貨櫃（00716）+14%

高仁在本周二推介勝獅貨櫃，當日低位2.64元，昨日曾高見3.02元，跟到足最多可賺14%。

JOYCE（00647）+13%

詩詩上周二建議留意翻炒JOYCE的機會，昨日高位見0.96元，收報0.94元，最多升近13%。

古勝