絲絲講場：MetLife派環保袋搶手
尋日絲絲經過大埔時，發現唔少人揸住大大個史路比環保袋，追查之下，先知原來係大都會人壽（MetLife）搞派環保袋嘅宣傳活動，聽啲職員講，佢哋上周已經喺將軍澳派咗4,000個，估唔到今次反應更熱烈，派咗兩、三個鐘頭依然有好多人排隊。
連串活動打響品牌
其實自從MetLife收購咗AIG旗下嘅ALICO後，已一躍成為全球最大嘅人壽保險公司。絲絲知道佢哋嘅香港區行政總裁成睿智（Rajesh Sethi）剛喺十月份上任，Sethi覺得MetLife規模雖大，但喺香港嘅知名度就唔夠，所以計劃透過連串活動打響公司品牌。
今次活動佢哋都花過心思，派發地點集中喺大型住宅區，希望品牌可打入民眾；環保袋上嘅史路比公仔更加珍貴，事關佢哋與史路比商標合作咗逾20年，MetLife係獨家使用該商標嘅保險公司。聽落咁吸引，搞到絲絲都心郁郁想今日去排隊攞番個。
余絲韻