金融界求才若渴，絲絲最近就睇到一則招聘電郵，原來係渣打（02888）想聘請一位宏觀經濟分析師，駐紮喺北京或上海，有興趣嘅人就快啲向渣打全球研究部應徵喇！
中國嘅經濟生產總值已超越日本，緊隨美國成為世界第二大經濟體系，過多幾十年分分鐘超越埋美國，依家已經冇人會忽視呢個市場，所以做中國研究嘅人才十分吃香，需求愈嚟愈大，近年亦有愈嚟愈多機構喺大中華地區開檔，請人真係可以話爭崩頭。
睇番渣打今次要求應徵者嘅條件都幾大路，例如要有好嘅團隊精神、良好分析及數據處理能力、有邏輯、有睇法，學歷方面最好有經濟學嘅研究生學歷，最特別之處係擁有內地傳媒嘅工作經驗都有優勢，如果可以用到記者嘅眼光去睇大陸某一項政策帶嚟嘅影響就更加之好。嘩！咁講法，內地讀經濟出身嘅行家好似好有機會咁喎！根據呢個電郵所講，如果符合上述條件，就要寫一份英文研究作品畀佢哋嘅大中華區研究部阿頭王志浩（Stephen Green），之後點？咪等面試囉！
余絲韻