過江女神：PR最愛忘年戀 願望被包
有o靚模被人拍到同中年富商飯局，事後當然例牌否認，高呼冤枉！至於同樣係女人嘅夜總會PR，講嘢就實際好多，PR夏果話每日返工都渴望有飯局，最大理想就係同中年甚至老年富商拍拖，阿妹話咁至係人生應有嘅理想喎！
撰文：祖
無非為錢
搵食邊使講仁義道德o架，你睇被喻為「紐約第一名妓」麥克倫南咁，阿妹擺明賣淫，又被控洗黑錢，轉頭仲話要出自傳，大爆賣淫性史喎！呢件極品每粒鐘收萬五港紙，不知高過幾多打工仔成個月糧啦！呢件名妓更係澳門×龍夜總會PR夏果嘅偶像，阿妹話：「出嚟搵食無非為錢，又唔係偷呃拐騙，使乜怕人點睇喎！不過我都明白，一般女人志願即使係想被包養都唔敢親口承認，事關佢哋怕畀人話係好cheap，但內心實情就不知幾恨，見到富豪就雙眼發光，呢種女人真係乞人憎！」哈，夏果你咁識睇女人，唔知外表又有冇得睇呢？「哦，外表好容易睇o架，每次出街都露事業線嗰啲，周身名牌虛榮怪都好大機會，另外，女人開口埋口都仁義道德，又或者經常話邊個邊個靠賣肉勾佬嗰啲，極大機會係呢種女人，事關佢哋得唔到，都唔想人哋得到囉！」照咁講，夏果你簡直入型入格噃！
男女不拘
夏果對被包坦白承認，阿妹話自懂事以嚟已希望被包養，兼係男女不拘添！佢解釋：「人生點解要咁辛苦呢？係咪事必每個人都要有大志呢？可以成功被人包其實都係一份工作，同時顯示出當事人有魅力，點解外界總認為係唔啱呢？我就唔會理，加入PR界多年，被男人包過四次，每次接近一年，成績都算驕人，仲搵落唔少添，而我發現，同愈老嘅男人一齊就愈開心，事關性事可以少好多，相反享受就多出好多，或者佢哋人生經驗豐富，識飲識食，畀人包不知幾爽呀！依家最大心願，就係被女人包，可以連性都唔使煩，爽呀！」