今年香港新股市道興旺，數吓手指先知就嚟有成90間新公司上市，不過有公關老友同絲絲講，話唔知係咪搞上市已經用晒啲腦汁，依家啲新上市公司愈嚟愈冇新意，通常唔係送水晶就係紙鎮，仲要冇乜特別意思。不過尋日世達送嘅特製模型就令絲絲眼前一亮，睇嚟香港人嘅創意仲未死得晒！
集多種產品砌模型
絲絲之前與世達老闆王國芳傾過偈，喺香港長大嘅佢話一直都好強調要喺日常生活中滲入創意，有世達同事就解釋，話今次其實係集合咗公司包括滑鼠、觸控式螢幕底板及指紋認證等幾種產品，配合製成一個仿中環建築物模型，主要係老闆希望可以喺模型入面滲入世達嘅產品，做出一啲代表作喎。
余絲韻