市場熱線：北控水務大行力撐

炒樓資金轉為炒股

新加坡、泰國、南韓、巴西同俄羅斯都已出招防止熱錢流入，香港「中門大開」，熱錢更加鍾意來港搵食；加埋港府調控樓市，炒樓資金轉為炒股，魚缸唔熱爆至奇。政府死攬住聯匯係「唔做唔錯」嘅心態，煲呔嘅「怪招」係用人仔債券吸走熱錢，但依家久不久至有幾十億人債發行，而且好快就沽清，遠追唔上人仔存款嘅增加速度，就算未來多幾倍發行，恐怕孖屐都係唔夠喉。

五中全會開波首日，滬綜指再衝至2,971點，升幅3.18%，已經係七連升，但同港股雞犬皆升唔同，A股只係集中升「大隻股」，例如錢莊股呢排大發神威，但細隻股就跌多過升，挾高指數嘅目的令人懷疑係股指期貨作怪。股指期貨上周五結算，兼且係推出啱啱半年，到依家都係保持成交量大（十一月26萬張）、持倉量低（2.5萬張）嘅特色，照計多數係玩「即日鮮」，但祖國嘅嘢一向好難估。十一月股指期貨高水近2%，未必係有乜嘢啟示。

「十二五」概念掀起尋寶熱，但同黃金周炒零售股一樣，炒完就散水，七大戰略新興產業係人都知，其實「十二五」重點係研究解決貧富差距，方法無非係向有錢佬收多啲稅，向窮人增加福利同打工仔加人工，所以房產稅無論目的是否「鬥地主」，遲早都會實施。

節能減排係另一重點，祖國率先公布個「階梯電價」鼓勵大家用少啲電，其實祖國最缺乏嘅資源係水，今年初西南旱災時已有專家建議加水費，但加水費好影響民生同通脹，而且舊年至加過，咁快再加實畀人嘈，但學電費咁，用得多要畀多啲，個制度好合理。

憧憬母公司注資

上個禮拜五，兩隻水股中國水務（00855）同北控水務（00371）齊齊升一成，唔通有「春江鴨」收到料會加水費？老古唔想亂估，但野村啱啱將公司嘅目標價由3.8元調升到4.2元，距離現價有近五成上升空間。野村預測，北控水務未來3年嘅每日污水處理量，將由100萬立方米提高1倍至200萬立方米，又話佢阿媽北控（00392）最快出年會注入水務資產。如果注資成事，隻股睇怕仲有大把水位，今年四月佢嘅高位係3.26元，定目標3.5元並不為過。

戰報

銀建國際（00171）+10.48%

古勝十月八日推介銀建國際，股價上周五高見2.74元，較推介當日低位2.48元累升10.48%。

國泰君安（01788）+23.56%

帥哥上周三推介國泰君安（01788），上周五高見5.4元，較周三低位4.37元勁升23.56%。