孖妹缸湖遊：網絡達人潮撐科技股

吳︰大福證券資料研究部分析員吳嘉倫

林：亨德森全球投資（香港）大中華區基金分銷業務高級經理林長青

打機體會好Game要訣

阿里巴巴（01688）及騰訊（00700）嚟緊兩日相繼發表中期業績，呢類專攻「宅男宅女」市場嘅「宅股」，分別已喺中國「B2B網購」及「網遊」市場獨佔鰲頭，盈利增長仲會有幾多？主力分析科網股嘅大福證券資料研究部分析員吳嘉倫以及入行逾9年嘅亨德森全球投資（香港）大中華區基金分銷業務高級經理林長青，都憧憬科網股潛力。

莉莉︰你哋幾時開始鍾意打機㗎？

林︰八十年代中開始打「紅白機」，有《孖寶兄弟》、《惡魔城》及《魂斗羅》遊戲，打機係過時過節嘅聯誼活動。遲啲Xbox出番呢啲舊Game，都會買番隻懷念一下。

吳︰最初都有打「方塊機」及「超任」，通常會與朋友一齊打，以前一隻Game可以玩到2至3年，依家「玩Game周期」就愈嚟愈短。

騰訊前景佳睇170元

高妹︰你有冇玩過騰訊嘅網遊《QQ仙俠傳》及《穿越火線》？

吳︰要玩騰訊嘅網遊都幾花時間，又要儲武器，呢樣都係騰訊面對緊嘅風險，遊戲機Wii和Xbox之所以受歡迎，就係因為遊戲結構夠簡單，容易約埋一大班人玩。

莉莉︰早前騰訊受到對沖基金狙擊、「Copycat（抄襲）」醜聞以及內地對互聯網嘅限制，令股價一度低見120元，未來有冇機會升上170元樓上？

吳︰七十至八十年代嘅日本、八十至九十年代嘅台灣及香港，每一個發展中嘅經濟都會經歷「Copycat」，一旦市場再趨成熟，呢個問題就唔會太影響騰訊前景；至於國家禁止18歲以下人士接觸受管制嘅遊戲，目前料對騰訊收入影響唔大。早前股價跌落120多元係一個好嘅撈貨機會，依家估值唔算貴，未來12個月目標價睇170元。

高妹︰似乎你對騰訊好有信心喎！

吳︰今年上半年內地互聯網用戶只係佔全國人口31.8%，滲透率仍然好低。整體嚟講，我預計騰訊今年上半年純利會按年增加63%至36億元人民幣，當中廣告業務喺第二季中按季增幅會最大，而由於季節性因素影響，佔總收入逾半嘅「互聯網增值服務」營業額則會按季下跌2%。

阿里增值服務拓錢途

莉莉︰科網股阿里巴巴主要以B2B電子商務為主，生意好依賴內地出口市場，買呢隻「宅股」要留意乜嘢風險？

吳︰整體全球經濟才剛復甦，料第二季付費會員人數增長會放慢，今年上半年阿里純利估計會按年上升33%至6.84億元人民幣，一年目標價睇19.5元。公司應重點發展「增值服務」平台，加強對中小企及國際貿易商嘅服務，以及開展由內需帶動嘅B2C新業務模式，維持長遠增長，對於今次業績，散戶可以留意呢方面嘅盈利增長。

莉莉︰比較環球科網股，中資嘅IT股估值好高，散戶可以憑乜嘢數據比較邊隻抵啲？

林︰經過科網股爆破後10年嘅汰弱留強，科技公司價值計算比10年前實際咗好多，以前用「點擊率」嚟衡量公司價值，依家會着重公司淨現金流水平，反而市盈率嘅參考價值唔太高。喺唔同地方，會計制度都會有改變，但市場對現金流嘅演繹唔會有太大差別，全球科技公司中，目前國際性科網股比較吸引，如蘋果公司及Google，公司冇負債之餘，每季盈利增長都唔錯。

「大換浪」刺激IT開支

高妹︰依家科網股似乎都炒高晒喎！

林︰睇住「IT Spending」個趨勢，即係科技公司肯使幾多錢喺IT項目上，就知道科技公司盈利增長。公司用喺IT上嘅開支比過去10年平均數低，自○四年市場對電腦軟件嚟咗個大更新後，○八年原本要再更新，但由於當時經濟唔好，好多公司有錢都用喺其他地方，估計下一個「大換浪」喺二○一四年，到時大部分歐美公司採用嘅電腦視窗「Windows Vista」都會喺二○一四年到期。

莉莉︰咁你見到公司開始增加IT上嘅開支未？

林︰依家企業對IT需求未係好明顯，因為企業公布嘅業績好壞參半，市場上仍然有人唱淡經濟，話將會出現P:「Double-dip（雙底衰退）」。不過隨着歐美公司盈利逐漸改善，一般企業用嘅Server（伺服器）愈出愈平，資料儲存容量大咗，但體積細咗，Server房嘅租金都少咗，以前通常更換Server要4至5年先可以回本，依家大約一年就可回本，相信未來好多公司願意加入更換Server行列，估計市場對IT投資會有明顯增長。

咁啱孖妹上星期與對沖基金經理錢志健（Ed）食飯，傾開電腦嘅嘢，身為公司老闆嘅佢，都話近期幾急切更新公司軟件，主要係改善「高頻交易」時電腦處理嘅速度。若一時間所有公司老闆都有Ed嘅諗法，科網股咪仲有得賺？最後，喺度用少少篇幅做樣善事，Ed出名為善不甘後人，想參與更多慈善工作嘅股友歡迎聯絡Ed，電郵係mdehedgecenter@gmail.com。

5成股友指樓價見頂

打完機不如睇番自己間屋。之前滙豐警告若本港樓價持續咁高，將形成泡沫，但花旗、野村、瑞信就繼續睇好樓市。股友認為本港樓價係咪已見頂？據今期《東方產經》網上民意調查，截至上周末晚上6時，兩派意見爭持不下，認為已見頂及唔認為嘅分別有49.5%及50.5%。

高妹、莉莉

若有料報畀高妹同莉莉或有嘢問，可電郵money.biz@opg.com.hk