市場熱線：潤電接力炒上

就算花旗經濟唔掂，孖屐更加大條道理相信政府會再推量化寬鬆政策救市，聯儲局周中發會議聲明，如無意外美國會再印銀紙「放水」，至於對經濟嘅後遺症三歲細路都知，不過依家冇第二條路可揀。

港紙跟住美金注定冇運行，呢排香港樓市咁興旺主要係三大因素：有排唔加息、貨幣貶值同埋通脹，其實係「三位一體」，買家冇咗加息後顧之憂，人仔兌港紙升值令到祖國炒家蜂擁入市，而面對通脹就最好買樓保值。政府推出「9招12式」，原本諗住捱到加息個樓市會自動煞車，點知呢支歌仔冇得唱，「9招12式」完全冇料到，結果炒風吹到去細價樓，個樓市泡沫愈吹愈大唔知點收科。

中美港魚缸氣勢如虹，恒指創三年新高，大笨象（00005）、大飛機（00293）、長實（00001）同和黃（00013）成績表全部靚爆鏡，長年牛皮嘅和記單日勁升接近一成極為罕見，細價股亦繼續精彩，幾隻粟米股：中澱（03838）、玉米油（01006）同西王糖（02088）上晒升幅榜，俄羅斯天災搞到小麥漲價，連帶作飼料嘅粟米亦炒高，粟米成本漲價本來不利呢類加工股，但在通脹環境下，將成本轉嫁去消費者身上係天經地義。

燃料成本壓力大減

要搵接力板塊，可以諗吓電力股，一來，過去幾個月幾乎完全無炒過，估值依然企穩歷史低位，後市有較大上升空間。此外，近年內地煤企大肆擴大產能，內地煤供應量開始無咁緊張，早前「美人林」就出報告認為未來庫存量開始由谷底回升，可見未來，煤價穩步回落機會十分大，對電力股燃料成本壓力大減。

眾多選擇，華潤電力（00836）向來乃古勝至愛，無歷史包袱，營運效率好過幾個老大哥，過去兩年的大量興建及購併新廠，正好配合內地經濟復甦，電力需求回升，早前公布上半年累計售電，就錄得37%大幅增長去到4,330萬兆瓦時，睇番上半年燃煤成本仲係升緊，下半年一旦轉向，一來一回盈利的反彈動力不容忽視。

大孖沙估緊，出年煤價回落有全年數字入帳，潤電盈利會由一○年的57億躍升至67億元，市盈率12倍，會係過去五年12至42倍的下限。現時入市再跌風險肯定有限。再睇潤電過去一年，股價在14至20元間浮浮沉沉，可是底位呈一浪高於一浪，大孖沙逢低收集的手影明顯，配合高煤價不利因素消除，只要升穿七月高位17.92元破大型W底頸線，隨時見到爆炸性升浪。

戰報

中國玉米油（01006）+11%

帥哥上周四推介中國玉米油，當日低位5.53元，周五成功突破6元關口高見6.14元，兩日升幅達11%。

中化化肥（00297） +10%

桃桃本月五日推介的中化化肥，上周五高見4.08元，較推介當日低位3.69元升10.5%。

古勝