孖妹缸湖遊：以圖喻市畫出彩熊

「債王」格羅斯話，全球經濟進入低增長年代嘅「新常態」（New Normal），股市增長最多只剩番低單位數。踏入下半年，孖妹都嚟個「新靜態」活動，放棄行商場，去做啲靜態嘅嘢。莉莉搵咗凱基證券亞洲營運總裁鄺民彬（Ben）傾「佛偈」，佢係虔誠佛教徒，每朝早5點半會打坐一個鐘，進行禪修；高妹就去睇「熊人畫」，仲專登搵「藝廊亞洲」幫手，成功聯絡英國畫家Garry Floyd，佢一向用「熊人」代表自己，以創作獨一無二、以熊為主題嘅粉彩畫成名。

凱基證券亞洲營運總裁鄺民彬 債務危機困擾全球

莉莉︰睇你公司嘅季度展望報告，每期都印有一幅畫嚟預示大市走向，聽講都係出自你嘅構思，創作靈感係點樣嚟㗎？

鄺鄺︰創作時會加入禪修概念，其實一幅畫未必有明確答案，但可啟發人嘅思維。投資者平時易受制外界言論，框住咗自己思考方向和範圍，圖畫幫助打開思維，令人諗出很多可能性。

莉莉︰第三季你創作嘅圖畫，係一隻疑似牛嘅熊人揹住好重嘅債務，你對後市係咪唔樂觀？

鄺鄺︰呢隻係「基因牛」，係延續去年第三季嗰幅「熊人媽媽生咗牛BB」圖畫嘅情況，當時各國政府注資，大市升到慶烚烚，我預測後市會有「見熊」嘅隱憂，嗰隻牛BB依家大隻咗，變成今年第三季嘅「基因牛」。佢揹住嚟自歐美或其他國家沉重嘅負債，好辛苦咁爬緊上去，負債有機會拖累佢跌落萬丈深淵。我估計下半年全球仍會受債務危機困擾，國家要滅赤，經濟增長會放慢，直到要見到大市有清晰前景。

下半年短炒龍頭股

莉莉︰全球經濟咁樣被拖住，下半年恒指大升嘅機會有幾多？

鄺鄺︰估計下半年大部分時間會喺19,000至21,000點上落，只約有一成嘅升幅，所以大家要「放下執着」，調低要求，唔好奢望仲有牛市嘅四至五成升幅先走。跟住恒指高低買賣龍頭股，走多幾轉，累積嘅回報應唔差，至於二、三線股份就唔好揀，因為市況唔好時，莊家都好難炒，大升機會微。

莉莉︰資金再回流時，散戶可買番乜嘢股？

鄺鄺︰下半年睇好內需股及能源股，雖然近期汽車及家電股跌得好多，但行業有中央支持，加上人民幣升值趨向明顯，出口股會轉弱，內需股繼續係市場主題股份，可逐步吸納TCL多媒體（01070）及吉利汽車（00175）；另外，全球經濟復甦緩慢，但不至於太差，中石油（00857）及中國神華（01088）亦有內需概念，值得買入。

英國名畫家Garry Floyd 勤力工作專注畫熊

高妹︰股友大多唔鍾意熊市，但你畫嘅「Bear bear熊」就好得意，令我好想抱住佢，喺你心目中，熊代表乜嘢？

Garry︰喺英國，熊代表每個人嘅童年，象徵「希望和愛」，我細嗰時有好多「Bear bear熊」公仔，每晚會攬住瞓。我知道喺其他人眼中熊代表另一樣嘢，所以兩年前起畫熊當寫日記，熊人代表自己，畫中加入童年最快樂元素，包括寵物兔和夏天，就係想強調可愛熊可幫大人重拾純真，搵幅畫代表自己。

英國名畫家Garry Floyd話喺英國，熊象徵「希望和愛」，不過，目前英國經濟欠佳，大家須勒緊荷包。	你認為這幅畫形容依家嘅港股貼切嗎？	放大圖片

冀新首相扭轉經濟

高妹︰歐債危機對你嘅畫家生活有冇影響？

Garry︰Not great！但英國經濟真係唔好，大家必須勒緊荷包，放棄過去10年依賴信用卡、商場卡和貸款嘅生活，重建「使幾多就儲幾多」嘅態度。我第一次經歷經濟衰退，好傷心見到朋友冇咗份工，但我好幸運，仍得到忠心「粉絲」嘅支持、買我嘅畫，目前未有受歐債危機影響，我相信新首相會扭轉經濟環境，為國民帶嚟希望。

高妹︰平時幾耐可以完成一幅畫？

Garry︰4年前，會用上3至4個鐘頭完成一幅畫，近幾年技巧成熟咗，畫嘅時間反而仲長，花最多時間喺基本構圖上，確保令初頭嘅草稿完美，依家完成一幅畫會用上約一個禮拜，之後兩日作最後粉飾。

高妹︰你嘅生活格言係乜？

Garry︰「當每一日係祝福，享受與家人和朋友嘅時間，勤力工作，向目標邁進。」過去4年，我付出好多努力，改善繪畫技巧，嘗試每一幅作品比之前畫得更好，好慶幸我嘅作品得到好多人愛戴和欣賞，亦有畫廊及出版商願意宣傳我嘅畫作。

高妹︰啲畫賣咗出去，賺番嚟嘅錢你會點樣用？

Garry︰首先我會請女朋友出夜街慶祝，之後部分錢擺落儲蓄，剩低嘅就投資於藝術事業上。最近我儲錢買樓，呢個係我嘅夢想，亦希望成為個人投資。另外，我會存起自己作品，若將來升值，可以留畀日後仔女，希望變成投資價值高嘅資產。

莉莉︰講完熊仔，相信大家都想知道謎底。熊貓最想做嘅嘢係……影一張彩色相。

動物嘅捕食方式可反映唔同嘅投資態度，睇吓自己似邊種動物？

獅子 投資進取，家庭理財上有嚴格分工

兔子 投資懂得分散風險

豹子 日投資膽大心細，先思考及分析後再作決定

資料來源︰互聯網

40%散戶抽農行

新股「巨無霸」農行（01288）正式開始招股，A、H股合計集資額有望超越當年工行（01398）嘅集資規模，而且農行係最後一家上市嘅四大國有商業銀行，你會認購嗎？據今期《東方產經》網上民意調查，截至上周末晚上6時，59.3%人話唔會認購，40.7%人就話會抽農行。

高妹、莉莉

若有料報畀高妹同莉莉或有嘢問，可電郵money.biz@opg.com.hk