上周一，受高盛被美國證交會檢控一事影響，港股一開市就裂口低開逾300點。大市轉跌、外圍市況未穩，加上內地與香港又齊齊出手打壓樓市，所以恒指整個星期都冇運行，走勢反覆向下，並且先後失守多個支持位，期內位於21,300至21,700點的恒牛證，亦均告被強制回收。綜觀上個星期，熊仔熊女就先勝一仗。
不過，淡友嘗得甜頭後，就未見乘勝追擊，反而好友則急不及待作出反攻，藉着大市反覆徘徊，而乘機儲牛，博大市經上次急回之後會有反彈。因此，上周一至周四流入恒指好倉的資金就達1.2億元，而淡倉則持續錄得資金流走，選擇食胡離場。
現時好友大增，單是處於20,500至20,999點恒牛證收回區的街貨，就達5.34億份之多，一旦全數收回，相信應該幾和味，吸引之極，所以唔排除市場本周將會追着資金來打，再大挾好友，值得留意。
至於個別股份方面，亦見資金流入做好。好似在四月十六日至二十二日，資金就持續流入睇好中國人壽（02628），期內金額共錄得3,704萬元；而淡友亦見紛紛獲利離場，期內流出金額共達1,353萬元。
國壽雖然獲資金一面倒睇好，可惜其股價未見支持，近日就連上升通道亦都失守，上周五再跌0.35元，收報36.35元，走勢轉差。
事實上，受內地調控政策拖累下，近日A股大幅回落，對於手持大量A股的國壽，亦帶來負面影響。加上根據集團早前公布，雖然公司今年首季保費收入雖按年上升6.06%，至1,103億元人民幣，但要注意的是，集團今年三月份保費的升幅，就較首兩個月有所放緩。營運數字未為集團帶來刺激作用，相信股價短期料難重拾升軌，一旦失守50日線水平，跌勢料會加劇。
若看淡國壽後市表現的投資者，可以留意中壽荷合沽（19726），行使價是36元，溢價6.13%但就提供8.59倍的實際槓桿，換股比率1兌10，但要留意該證將於六月二十九日到期，不過由於數據唔錯，會是短期追沽不俗的選擇。
侖旺