辭職日獲委任顧問

不過，中芯尋晚發出一則公告就叫絲絲有啲意外，話說中芯呢份《關於董事變更之進一步資料》嘅公告，除咗講吓新任總裁兼首席執行官王寧國嘅人工，以及多謝大股東大唐電信及上實集團嘅支持外，最搞鬼係原來李察被委任做中芯顧問，以向公司提供意見咁話，更好笑嘅係生效日期又係李察辭職嗰日。

絲絲唔係好明，既然委任李察做公司顧問，點解唔喺李察辭職嗰份通告宣布埋？即使真係唔記得，又點解要個幾月後先公布番呢？如果係之後先想搵番李察做顧問，又點解要話係上月十一日委任呢？如果台積電真係如傳聞所講要李察離開先肯和解，咁又點解要搵佢做顧問呢？呢幾個問題，惟有等中芯班新管理層出嚟同大家解吓畫先得。

余絲韻