本文重點
絲絲每日都睇聯交所資料，竟然發現有「金牌莊家」之稱嘅立法會議員詹培忠，申報喺本月十日突然持有百營環球（00761）1.82億股，即係成6.86%權益，但就冇披露作價，絲絲即刻打電話畀呢位老友，質問佢點解買多隻殼都唔話畀絲絲知，但老詹今次就好口密，死都唔肯透露詳情。
市場盛傳以股代債
今次老詹係由原本冇貨變為持有百營環球6.86%，絲絲就聽聞，百營環球主席施展望與「金勞詹」有啲錢銀瓜葛，江湖傳聞話今次可能係「以股代債」，仲話施展望有意將股票還畀金勞詹，估計老詹今次持有百營環球可能會有後着，或者仲會增加持股。百營環球股價尋日就收報0.206元，單日大升12.57%。
其實「金勞詹」都算係近年嘅「殼王」，高峰期佢曾沾手嘅上市公司多達20間，最近呢兩年半沾手嘅都有12間，早前賣咗5間，剩番7間揸手。市傳又有幾隻殼向佢招攬緊，絲絲會留意佢會唔會忍唔住又買番一、兩隻。老詹買上市公司，就好似絲絲買衫咁，真係誇張。
余絲韻