本文重點
強積金計劃實施咗近十年，打工仔都知道要為將來打算，但對小朋友講強積金，佢哋通常都唔知係乜。積金局就認為要從小做起，推出有關理財嘅故事書《幸福的積金國》，送畀四百三十五間幼稚園共八萬位小朋友，向佢哋灌輸儲蓄及善用金錢嘅理財概念。
故事書深入淺出
積金局對外事務主管陳利碧衡就話，對於年紀細嘅小朋友，用講古仔嘅形式可以做到深入淺出，令佢哋更容易明白。除咗呢套故事書外，積金局仲特別為老師印咗活動教材，等小朋友可透過角色扮演更了解故事中嘅訊息。
對應唔同學生嘅需要，積金局仲提供唔同嘅理財活動，好似嚟緊畀幼稚園學生參加嘅「為未來畫出彩虹」繪畫比賽，中學生組別就有「互動劇場」等，目的係從小培養佢哋嘅理財知識。
余絲韻