本文重點
如果你問絲絲最能代表香港嘅飲品係乜，我一定會答係絲襪奶茶！唔少人每日至少要歎番一杯。貿易發展局為咗向內地宣揚香港生活文化，特別喺重慶舉行嘅「香港時尚購物展」加設咗香港茶餐廳專區，仲搵埋渣打銀行冠名贊助，茶餐廳專區除咗有奶茶「至尊配搭」菠蘿包售賣，仲請埋香港「金茶王」大發餐廳嘅賴旺明師傅坐鎮，表演「拉茶」功夫。
購物展宣揚奶茶文化
出席茶餐廳專區開幕儀式嘅貿發局總裁林天福話，今次購物展唔單止要表現香港時尚嘅一面，仲要畀重慶市民親身感受香港地道嘅茶餐廳文化，藉此進一步拉近兩地之間嘅距離。
林天福亦立刻發揮「好客香港」嘅精神，即場請重慶市人民政府副市長周慕冰享用茶餐廳專區第一杯沖出嘅奶茶，周副市長仲大讚好飲添。絲絲在場所見，茶餐廳專區整日都坐滿晒茶客，睇嚟重慶市民除咗鍾意食麻辣，未來仲可能上埋港式奶茶癮。
余絲韻