本文重點
近排樓市轉靜，卓能（00131）旗下嘅一號九龍山頂就因為未有售樓紙，冇得食住先前個勢賣樓，主席趙世曾尋日同絲絲講起呢單嘢都好勞氣。佢話呢個盤喺○七年底已經攞咗入伙紙，但由於興建過程中曾經搬遷及損壞咗幾棵樹，地政總署就一拖兩年都唔批售樓紙。卓能試過提交種樹方案，又要求賠錢了事，但地政總署就硬係冇回應。
拖慢項目進度喊冇癮
趙公子好感慨咁話，當年佢畢業後第一份工就喺屋宇署打工，當時政府效率高好多，入則由一個人批晒，唔似依家要牽涉屋宇署、地政署及城規等多個部門，各部門各自為政之餘，官員又抱住「唔批唔錯」嘅心態，拖慢晒項目進度，中小型發展商「牙力」唔夠，生意特別難做。
佢坦言對香港政府效率今非昔比感到「灰心」及「痛心」，甚至話未來都冇乜信心喺香港搞地產喎，寧願將投資重心轉移大陸、澳門及大馬。佢又話自己喺香港做唔到生意好閒，公司業務對香港嚟講亦微不足道，但見微知著，如果港府繼續咁樣嘅工作效率，香港只會愈嚟愈冇競爭力！
余絲韻