3人董事會一家親

公司註冊署資料顯示，呢間榮氏企業註冊資本得40蚊，喺六月十九日成立，公司董事會成員除咗榮太子之外，仲有佢嘅長女榮明方同埋阿仔榮明棣一共3人。據絲絲老友話，家陣榮太子嘅兩仔一女都喺中信泰富打緊工，榮明方喺舊年發生咗炒燶外匯事件後，畀人由財務部調咗去房地產部門；榮明杰就一向都喺中信泰富房地產部門打骰；至於榮明棣就一直係主席助理無變過。

唔知未來佢啲仔女如果身兼兩邊職務會唔會有利益衝突之嫌？熟悉榮太子嘅人估計，榮太子安排好後路之後，佢啲仔女相信唔會留喺中信泰富，所以唔使擔心利益衝突問題。至於與榮太子一齊共同進退嘅范鴻齡，佢個名就唔喺榮氏企業董事名單內。

余絲韻