筆者曾問過一個華南最大油漆企業老闆，到底邊種墨水生意最賺錢，老闆隨即答道：「印銀紙同印煙紙」，銀紙用油墨點解貴，唔使問阿貴都明，至於印煙紙，理由原來都差唔多，煙枝由煙草與捲煙紙組成，煙草可是全球生產成本最低，又賣得最貴的植物之一，賣煙順理成章成為毛利高到離譜嘅生意（如果唔係全球政府不斷收緊煙草商廣告影響市民，過往他們都大花銀彈佔去廣告開支企業首位），為防假冒，煙紙防偽技術及印刷油墨技術，幾近可媲美印銀紙。
以連環購併壯大規模
統計話，中國有3.6億名煙民，等於全球煙民四分一，市場之大唔使多講。可惜的是，不少基金寄予厚望的內地捲煙紙行業龍頭澳科控股（02300），卻交出一份相當令人失望的成績表，賺2.02億元，倒退14%，股價連插兩日，由5.4元跌到3.94元，跌幅兩成七，兩日市值唔見咗16億元。
澳科前身為偉誠，○七年引入澳洲包裝界巨頭Amcor，隨即透過連環購併，壯大內地捲煙紙市場份額。
中期業績即使倒退，可是參考大行綜合預測全年賺4.5億元，目前算是達成目標的四成五，芬佬理應不致去到要錢唔要貨咁絕，由幾份大行報告，睇到分析員主要係關注業績後的交易，澳科會把兩年前收購的盈利支柱貴聯，以毛利下跌為理由，賣番畀舊股東，瑞信驚澳科會面對市佔率及重要客戶一併流失的問題。
貴聯貢獻走樣致分手
再由交易通告，澳科指：「貴聯盈利或會繼續下降，附屬公司常德金鵬牌照，也可能在二○一○年四月屆滿後，不獲續期，澳科由常德金鵬管理層得知，中方夥伴考慮到相關政府政策後或不會續牌。」
撤出同貴聯貢獻走樣有關，也反映內地煙草生意雖然零散，但要透過收購重組擴大市場一啲都唔易，一朝天子一朝臣，換咗掌舵人煙廠唔賣帳，供貨關係隨時玩完，即使當日賣方有三年盈利保證（首三年利潤不少於2億元、2.1億元及2.2億元），理應仲有一年玩，澳科亦唔等而急急分手。計埋交易後股份注銷，澳科股數回到9.23億股，市值36.4億元，瑞信、星展證券分別將今年盈利預測降至3.02億元及3.47億元，市盈率10.5倍及12.1倍，與生產香煙香料的華寶（00336）20倍以上比較，都算平，大孖沙沽乾沽淨後可以留意。
戴峰修