本文重點
中國人做生意真係好醒目，令人眼界大開，倫敦金融商品期貨商蘇克敦（Sucden）嘅老外負責人Jeremy Goldwyn最近到過內地，話包括豬農在內嘅私人投資者，可能睇好政府加快基建刺激經濟計劃，竟然好似儲金咁儲存大量金屬銅，佢估計數量有成五萬噸咁多，差唔多係家陣上海商品交易所銅儲量總數嘅一半！
投資者儲備5萬噸
有上海分析師就話，其實好多內地儲銅投資者，佢哋自己嘅生意根本與銅完全無關，儲埋咁多銅只係好似儲黃金咁為求保值。又難怪內地投資者咁睇好銅嘅，倫敦金屬交易所嘅銅價今年以來就升咗近倍，若以近兩日每噸6,470美元計算，內地投資者揸住嗰5萬噸銅，市價就值成3.24億美元。
Goldwyn笑稱咁多金屬銅由豬農持有，根本就唔係正常市場嘅舉措，佢相信喺可見將來，即使銅價下跌，豬農亦唔會如外界估計般會大舉沽銅。佢仲話內地對銅嘅需求上升，更轉至更下游產品，例如製作冷氣機內嘅銅喉管，呢類需求已回復至金融海嘯前水平，未來數周及數月會出現強勁升幅。
余絲韻