本文重點
絲絲有次同招商局（00144）常務副總經理胡建華食飯講開佢個仔，胡總笑晒口咁話，阿仔家陣喺澳洲讀緊高中，就嚟考大學，佢喺內地讀書時表現無乜特別，但一去到澳洲，胡總就發覺原來中國人真係好叻，事關每年學校有好多比賽，佢個仔都有獎攞，就算喺啲番鬼佬至勁嘅游水比賽，佢個仔「係咁意」參加吓都攞冠軍。
點解會咁犀利呢？原來喺呢個「係咁意」嘅背後，胡總呢位爸爸投入咗好大嘅精神去培育，佢個仔自細就好多嘢學，仲學親都係跟名師。
名師指導 攞獎話咁易
就好似游水咁，佢個仔11歲就開始跟國家級嘅教練學咗好多年，呢個「係咁意」真係唔易㗎！胡總仲好謙咁話，家陣中國人去到外國好似樣樣都掂，重點係中國一孩政策，家人將全部精神同心機都放喺一位小朋友身上，想唔優秀都幾難啦。
絲絲心諗，鬼叫佢個仔有個咁出色嘅老竇咩，事關胡總都唔嘢小，佢工作經驗唔使多講，佢仲喺英國伯明瀚大學度讀碩士，喺澳洲國立南澳洲大學讀埋工商管理博士學位添，個仔遺傳咗胡總嘅先天，再加後天嘅培養，又平庸得去邊呀！
余絲韻