本文重點
呢排絲絲同好多紅籌公司老友飯敍，佢哋個個都牙痛咁聲，係咪因為畀金融海嘯搞到業績麻麻所以唔開心？啱咗一半，係就係與金融海嘯有關，但唔係業績，好多老友都話真係多得中信泰富（00267）唔少，佢哋喺去年十月嘅金融海嘯炒匯「爆煲」事件影響深遠，搞到國資委查數查到家陣都未收手。
認真到要用放大鏡
事關呢單嘢發生後，作為國企紅籌大股東嘅國資委，開始意識到大股東嘅重要性，唔可以再放手畀旗下嘅紅籌國企自把自為，所以就未停過查數，仲要愈查愈仔細。有老友仲話，派嚟查數嘅人員仲認真到要用放大鏡睇數，到依家都仲查緊，當然公司行得正、企得正就梗唔使驚，但真係多咗好多嘢做。絲絲都好明白，又要搞業績報告，又要應付啲嚟查數嘅大股東又真係好多嘢做，但另方面亦顯示咗國資委開始做嘢，以後啲國企紅籌無論喺監管及質素上都有望更上一層樓，對投資者嚟講係好事。
老友仲話，國資委亦深深咁意識到大股東嘅權益，雖然依家仲未開始，但應該好快要向紅籌公司要求分紅㗎喇。
余絲韻