本文重點
滙豐中國董事長鄭海泉早前豪擲190萬元人民幣，幫襯自己公司買人債，身體力行咁撐滙豐！依家佢獲批96萬人仔嘅滙豐人債，計計埋埋兩年唔計升值，已經可以穩袋約5萬蚊人仔利息。滙豐人債超購1.2倍，鄭大班抽到一半，條數都係差唔多。折合番港紙計算，利息大約係56,600元。
鄭大班嘅人債兩年期先賺到嗰5萬幾蚊利息，比起佢嘅年薪真係濕濕碎！佢當然唔會貪嗰少少錢，人債集資所得淨額係用於滙豐中國擴展業務嘅一般融資用途，所以佢當然要捧場啦！
之前先辛辛苦苦兌咗190萬人仔，依家就用咗96萬人仔買滙豐人債，剩低嗰94萬人仔做乜好？絲絲就話一於買國債喇！
「用剩」94萬人仔諗國債？
雖然依家仲未知國債嘅息率，大家都估計會比一般銀行發行嘅人債差啲，不過買國債有愛國嘅象徵，鄭大班一向熱愛祖國，而且家陣金管局仲批准銀行嘅國債銷售過程簡化，唔使搞好多手續就可以買到，畀着絲絲係佢，就一定再落重本買國債，話唔定依家仲要開始換多啲人民幣，喺國債度再重錘出擊！
鄭大班買滙豐人債因為利益關係要披露，但買國債買幾多就真係可以收收埋埋，希望到時佢可以話畀絲絲知佢入咗幾多飛啦！
余絲韻