炒咗外匯咁多年，寫又寫咗幾年，小妹都要離一離場，尋求人生意義，所以今次係我最後一次同大家分享炒匯心得。好多人都會覺得炒外匯好難賺錢，我覺得係同大家嘅投資習慣有關。
以香港回歸之後計，出現亞洲金融風暴，加上地產市場泡沫爆破之後，再嚟一個更加虛幻嘅科網股泡沫，股市跌到去○三年發生沙士先至開始回升，到○七年尾，油、金、商品、股市同外幣齊齊炒到前所未有咁高，當時歐、美經濟已經出現滑落迹象，但無人理會，直到美國爆發信貸危機，全球金融市場崩塌。
上述期間唔少人由天堂跌落地獄，亦有人一朝發達，但更多人原地踏步。把握時機係好緊要嘅，一旦發現大趨勢將至，就要乘風起帆，點先知道即將出現趨勢市？咁就要憑你日積月累嘅經驗。簡單啲講，有趨勢就咬住唔放，但炒開短線嘅多數捉唔到大趨勢，炒開長線嘅，遇着上落市就畀個市左一巴右一巴，點樣同幾時調整策略係勝負關鍵。
蘇小妹