港股過去呢個星期真係好犀利，連升七個交易日不特止，恒指仲一口氣升穿埋16,000點及17,000點呢兩個重要心理關口。單係上個星期，市場就一共有超過300隻熊證被強制回收。
上周五恒指服務公司公布季度檢討，除咗由華潤電力（00836）取代裕元（00551）成為藍籌股外，滙控（00005）佔恒指比重，亦被調低5個百分點，由20.11%降至15%。之前滙控股價跌到極度低殘之時，由於佢佔恒指比重達兩成，因此大戶用佢嚟將恒指舞高弄低，成本比以前低咗唔少。唔使講咁遠，就睇番今次升浪，恒指七個交易日內升近3,000點，重返17,000點水平，當中滙控出咗唔少力㗎。
至於市場消息方面，受惠上周五發改委宣布，確定原油價格由企業參照國際市場價格來自行制訂；而成品油價格則由政府指導價或政府定價，從而改善石油價格形成機制，三大石油股表現唔錯，相信今日續有升幅，可予留意。
（小尾）