愈升愈有 淡友挾到暈
上星期落到魚缸，唔少股友捉住我呻「啲熊仔被人殺晒！」上周港股無懼「疫市」愈升愈有，熊證自然有難。傷在熊身，痛在股友心，唔少股友早已買落熊證同認沽證做淡，特別係恒指熊證，上周被收回嘅恒指熊證街貨量，相等於沽咗大約5,000張期指，係我有印象以嚟最多。
個市愈升，股友愈想再買熊證。近日魚缸金句似乎係：「今日升咁多可以買熊仔喇。」吓？今日升聽日就跌，原來咁易炒㗎？你哋成日問我聽日個市升定跌，睇到咁短線我真係唔識答。其實我上月十四日喺呢度提過恒指今輪升浪可見18,000點，到上月二十七日就修改為可以挑戰250日平均線（現於17,452點），仲一直提醒個市會「急升忽跌」。
國指上周率先升穿250日平均線，有人認為恒指有能力升穿呢條「牛熊分界線」，港股正式「熊去牛來」，但一直以嚟亦有好多人反對就咁定牛熊。對於我嚟講，用250日平均線定牛熊，不如用嚟定出入市策略仲實際。
參考專家指標分析避險
「簡單移動平均線」（SMA）係個簡單易用嘅出入市指標，正如我提過好多次嘅「50日平均線出入市法」，但美國人鍾意用200日平均線捕捉長線趨勢，仲有唔少學術研究支持。
例如投資經典《Stocks for the Long Run》作者、被譽為「長線投資大師」嘅西格爾（Jeremy Siegel）都用過一八八六年至二○○八年嘅道指做研究，當指數高於200日平均線多於1%就買入，低於1%就沽貨轉揸國債，結果發現即使扣埋交易成本，經風險調整後回報都比長揸好。
仲有，投資及風險顧問公司Cambria Investment Management董事總經理Mebane T. Faber今年二月份有個研究，仲刊登咗喺學術期刊《The Journal of Wealth Management》。佢引用一九○○年至去年嘅標普五百指數，當指數高於200日平均線就買入，低過就沽貨，發現呢個策略複合年回報有10.45%，高過單係長揸嘅9.21%，雖然升市時回報稍差（相差不足1個百分點），但跌市可以避免損失（相差近20個百分點），既可捕捉升市，又有效避開跌市。
「紅移」印證隨時大爆炸
要留意，如果你想用以上策略，就必須嚴守紀律，次次跟足出入市訊號行動，因為SMA有時會發出錯誤訊號，但長線都係啱多過錯。當然，過往表現唔代表將來，話唔定呢種策略已經不合時宜，喺呢一刻我無法肯定。
個市猛升，係咪「熊移」（熊市遠去）？物理學內嘅光譜學有樣嘢叫「紅移」（Red Shift），天文學家會利用光譜量度宇宙星體同地球間距離，光譜有紅藍兩端，當星體離地球愈遠，發出嘅波長愈長，紀錄喺光譜上愈傾向紅色一端。就係呢個方法證明「宇宙大爆炸」理論，因為測到星體離地球一日比一日遠，意味宇宙正在膨脹，即可以假設地球形成時所有物質聚喺一點上爆炸，然後不斷緩慢膨脹。
33%股友信係「真牛市」
打岔到咁遠，其實係我擔心股市同宇宙一樣，熊市喺一刻間爆發出嚟，但「熊移」就要漫漫長路。
今次《東方產經》網上民意調查問股友，認為近排港股是「真牛市」抑或「疑似牛市」？截至上周末晚上6時，結果33.3%話係「真牛市」，有54.5%認為只係「疑似牛市」，其餘12.2%就話唔知道。
好多前輩都話，牛市定係熊市，往往要回顧時先知。咁又係，無論專家抑或股友，無論睇好定睇淡，都可能只係瞎子摸象，大家對住同一個股市，望住同一個走勢圖，但詮釋可以相當唔同。
好似「新末日博士」魯比尼早前接受美國《新聞周刊》訪問時話：「半年前我擔心經濟『L形』走勢發展，但一連串刺激措施下，我相信會係『U形』走勢。當我哋更接近經濟底部，股市似乎會跑先，開始望到隧道盡頭嘅燈光。」
嘩！新末日博士都轉軚？佢話：「I am not Dr. Doom. I am Dr. Realist（我不是末日博士，我是現實主義博士）。」
講講吓，大家仲記唔記得豬流感（H1N1甲型流感）？世衞（WHO）話雖然疫情看似緩和，但都唔可以掉以輕心。本周三就係「香港女兒」謝婉雯醫生忌辰，佢喺○三年沙士成為第一個殉職醫生，唔好次次都要針拮到肉先知痛呀。
（大健）
若然有料想報畀大健或有嘢問，可電郵money.biz@opg.com.hk。