當人人認定經濟仲係低處未算低，港股惡極有個譜之際，點知恒指卻係升到你唔信，短短七個交易日，先後破萬五、萬六、萬七點三個關卡，氣勢逼人。
近期升浪中資股禾雀亂飛，走咗雞又怕遲入市追寶尾，電力股相信是仲有落後條件可以炒一炒的板塊。眾多選擇中，剛入選藍籌成分股，預期未來兩年將會受惠於發電量增長，以及煤價高位回落的華潤電力（00836），應屬首選。
去年煤價高企，惟華潤電力去年仍錄得盈利，而且今年首季全國電力銷售持續疲弱，早前公布的數據顯示，集團依然錄得2.3%發電增長，跑贏同業。展望今年內地通脹壓力大減，市場預期第二三季電價有被調升可能，對潤電的好處不言而喻。股價上周五報收16.42元，只停留在三月底水平，同期國指升幅兩成三，單是追回升幅已經夠和味，目標價20元，跌穿16元止蝕。
古晨