上星期個市都幾考人嘅耐性同信心，當然，有耐性未必就可以等到，有信心亦唔一定就會贏，但冇咗呢兩樣，贏輸嘅比例就差好遠。有耐性唔係話捱價位嗰陣，而係等位入市嘅時候，因為幾時入市你可以完全控制晒，處於主動狀態，但入咗市就受市場控制，即刻處於被動狀態，所以如果唔掌握好入市時間，賺錢嘅機會率已經大幅降低，輸錢機會就會愈嚟愈大。
我時時強調，唔可以將原本有錢賺嘅倉變成蝕錢，意思即係話，一旦市況逆轉，利潤開始減少嘅時候就要考慮係咪應該獲利離場。小數怕長計，每日賺100蚊點都好過每日輸10蚊。好多人仲唔明白，炒匯嘅真諦係畀機會你賺快錢，唔係畀你一鋪贏層樓返嚟，唔係唔得，意思係話，唔好過分期望市場會畀到好大波幅你，要賺多啲，咪勤力啲炒多幾轉，或者每次落重啲注碼囉，又唔想冒風險，又要賺大錢，有咁筍嘅嘢，叫我畀錢買都制。
上星期喺1.5112揸咗一手鎊，但上星期五就跌到1.4970，好彩之後都守番住1.50，美國就業數據比預期好，隻鎊衝一衝1.51又落番去，好彩尾段發力衝上1.52，之後我喺1.5225平倉，今日等佢回番落去1.50先至吼位揸過。
蘇小妹