花旗自經濟爆煲以來，可以講係岌岌可危，但過去一個月，花旗官商一條心，齊齊諗計「搵水」救火，先有花旗政府公布一啲好見得人嘅經濟數據，雖然當中唔少數字仲係下跌，但全數高於市場預期，加上各大行出力唱好，又話經濟見咗底，早買早着，遲買瞓唔着。咁又係喎，道指過去兩個月升咗三成，啲錢莊股更可以用坐火箭來形容，多者七、八倍，少者都一倍有多。
花旗錢莊愈衰愈炒
市況回升番，股民信心都返晒嚟，唔少更出現「缺貨恐慌症」。結果壓力測試結果公布後，邊間缺錢最大，就掃貨掃到最狠，令嗰啲早前一如垃圾般嘅錢莊股，突然變得有價有市，而且更供不應求，現時更唔使再靠政府救助。發展至如此景象，花旗國財長蓋特納真係可以飲得杯落。
但話說回頭，測試報告以失業率10.3%作為測試指標，已經有10間銀行出現資金不足問題，四月份失業率8.9%，情況會否惡化？古勝烏卜卜。除非五月份新增職位，由四月份嘅每月流失53萬份，變回正常的每月新增30萬份，否則失業率只會有升無降，咁五、六月份係唔係又應該要再做下一期壓力測試呢？
全球熱錢四處亂炒，花旗魚缸既然有官商同護航，各地對沖基金更加有恃無恐，港股近日更能感受到水浸之威力，恒指連升七個交易日，一口氣升咗成2,834點，累計升咗近兩成，都幾誇張，就連金管局老任都開腔叫股民小心，咪咁勇高位追貨。
現時市場資金不斷找尋投資目標，除較高風險的投資外，避險性較高的黃金仍有一定吸引力。除直接投資黃金或相關的ETF外，金礦股亦是選擇之一，因為可受惠於金價向上的同時，部分金礦股亦有穩定的股息派發。選股方面，紫金礦業（02899）是業內龍頭，較其他較小型企業有優勢。
首季業績增長不俗
近日大市升勢較急，有必要考慮買入具防守能力的股份，紫金基本因素良好，按中國會計準則第一季盈利同比增長21%至9.12億元人民幣，主要由於生產開銷及行政管理費用成本管理較佳所致。而期內自產金、黃金加工、銅精礦及鐵精礦銷量均有可觀增長，相信集團中短期仍然可受惠於商品價格回升的趨勢。
雖然早前集團受到關於內地有股東在四月尾至五月初時，大手減持集團A股股份，以及有較多限售股解禁的不明朗因素影響，但其H股表現穩定，上周五更再現突破。技術上，其股價在6.14元的10日線支持力甚強，如果大市走勢配合，短線有力挑戰7.2元的阻力區。
古勝