於今次升浪中，大藍籌逐隻炒上，好似先有滙控（00005），再有中資銀行股，繼而港交所（00388）股價亦都衝上90元水平樓上，一輪過後，尋日就輪到股價較為落後的中移（00941），單日升4.7%，收報73.15元。
不過市場上，其實除藍籌股外，細價落後股亦炒得禾雀亂飛，當中資源以及有色金屬股勢頭依然強勁，至於內房股在市場憧憬內地將再次減息底下，亦先跌後回升，其中較為落後的股份如中渝置地（01224）更於尾市做好，全日上升13.51%，收報2.52元，成為內房股之冠添。其實大市向上之心如斯明顯，相信挾淡倉活動一日未正式完結，股份仍續有追捧。
另外，家電下鄉政策已實行好一段日子，尋日內地商務部發言人就公布，政策成效良好，今年首季累計銷售下鄉家電產品達270萬台，而銷售額亦達40億元人民幣，消息屬於正面，在大市追炒落後股情況底下，唔排除今日相關股份將借勢炒番轉，可以留意。
（小尾）