闊別大家7個月嘅張耀堂（Sunny）終於重出江湖，佢嘅新職位係做Visa香港及澳門地區總經理，負責掌管Visa喺呢兩個地方嘅發展策略。身經百戰嘅Sunny，返工前一日竟然都緊張到瞓唔着，可想而知佢對新崗位幾咁重視。
之前喺星展銀行擔任董事總經理兼大中華區個人銀行業務總監嘅Sunny，喺銀行界大大話話都有超過30年嘅豐富經驗，自從舊年九月辭咗職後，佢除咗花更多時間同屋企人、朋友相處，亦都好留意市場發展，一啲都冇脫節。
抖咗咁耐，都係時間出嚟再搏殺過，香港地重視人才，一向人緣好到爆燈嘅Sunny自然係「搶手貨」，不過由以往做開銀行，依家轉做支付行業，Sunny好謙咁話都有唔少嘢要適應同學習。尋日已經返咗第一日工嘅佢，收到唔少各方友好嘅即時祝賀。
日後Visa港澳區嘅品牌形象建立同埋開拓業務就靠晒Sunny，至於前任香港及澳門地區總經理杜卓文就轉為韓國地區總經理，去咗首爾履新。
余絲韻