本文重點
上市公司業績期近尾聲，人事變動頻繁，絲絲尋日發現有幾間公司派完「成績表」後，即出現高層大執位，好似自然美（00157）委任蕭文聰為集團營運長，金鷹商貿（03308）韓相禮調任非執董兼辭任CFO，飛達（01100）就有執董辭職，所有變動都係尋日生效。
自然美營運長上場
絲絲尋日見到新上任自然美營運長嘅蕭文聰，佢話原本係公司台灣嘅首席營運總監，依家升為集團營運長，即係睇埋中國市場，所以前幾日去咗上海了解情況，以後會長駐中國。至於前中國首席營運總監楊王秀萍，聽講佢想抽多啲時間陪屋企人，所以辭職。
金鷹執行董事韓相禮唔做公司嘅CFO，去咗附屬公司做行政副總裁兼CFO，又由執董轉為非執董，金鷹公布CFO由年僅36歲嘅戴苹接任。呢位女士雖然年紀輕輕，但已有13年審核同財務管理經驗，去年九月加入公司做總裁助理，同年十一月兼任財務總監，依家升做CFO，相信前途無可限量。
飛達早排出咗業績，尋日公司董事陸一平辭任執行董事及營運總監，飛達發言人話由於佢要發展其他事業，所以辭職，營運總監個位仲搵緊人接替。
余絲韻